Sot, në mjediset e Institucionit të Prefektit të Qarkut Lezhë, u zhvillua një takim pune me përfaqësues të IDRA Research & Consulting, të kontraktuar nga UNDP për hartimin e Strategjisë së Turizmit dhe Vlerësimit Strategjik Mjedisor për Bashkinë Lezhë, në mbështetje të zhvillimit të qëndrueshëm të turizmit.

Në takim morën pjesë përfaqësues të AdZM Lezhë, DRIKMT Lezhë, ARM Shkodër-Lezhë-Kukës dhe Bashkisë Lezhë.

Përfaqësuesit e IDRA Research & Consulting, znj. Stela Daiu, z. Eduardo Martinez dhe z. Gjergji Selfo, prezantuan synimet dhe objektivat e strategjisë, e cila do të mbështetet në analizën e situatës aktuale të turizmit, përcaktimin e vizionit afatgjatë, objektivave strategjikë dhe ndërhyrjeve prioritare për zhvillimin e turizmit në Bashkinë Lezhë.

Prefekti i Qarkut, z. Taulant Malshi, vlerësoi rëndësinë e kësaj nisme për zhvillimin e turizmit në Lezhë dhe në rajon, evidentoi arritjet dhe problematikat aktuale, si dhe garantoi mbështetjen e plotë institucionale për koordinimin dhe bashkërendimin e institucioneve rajonale në procesin e hartimit të strategjisë.

Në përfundim, u shkëmbyen ide dhe sugjerime mbi situatën në fushën e turizmit dhe mjedisit, si dhe u dakordësua vijimi i bashkëpunimit për shkëmbimin e informacioneve dhe të dhënave të nevojshme për projektin.

Nën drejtimin e Prefektit të Qarkut Lezhë, u zhvillua takimi i Komitetit Rajonal për Parandalimin e Radikalizmit dhe Luftës kundër Ekstremizmit të Dhunshëm, me pjesëmarrjen edhe të Zëvendësministres së Punëve të Brendshme, znj. Silva Caka.

Gjatë takimit u analizua puna dhe masat e ndërmarra gjatë periudhës janar–shtator 2026.

Prefekti vlerësoi punën e Komitetit Rajonal dhe të institucioneve të përfshira, duke theksuar se gjatë kësaj periudhe nuk janë evidentuar apo referuar raste konkrete të radikalizmit dhe ekstremizmit të dhunshëm në Qarkun Lezhë.

Znj. Caka informoi mbi strategjinë e re kombëtare që ësht në proces hartimi, ndërsa theksoi nevojen për forcimin e bashkëpunimit ndërinstitucional dhe vijimin e masave sensibilizuese e parandaluese.

Nën drejtimin e Prefektit të Qarkut Lezhë, u zhvillua një takim koordinues me drejtues të DRAP Lezhë, Zyrave Vendore të Arsimit Parauniversitar, Bashkive të qarkut, Drejtorisë Vendore të Policisë Lezhë, DRIKMT Lezhë, DRAKU Lezhë dhe ISHSH Lezhë, me qëllim vlerësimin e gatishmërisë së institucioneve për nisjen e vitit të ri shkollor.

Në fokus të diskutimeve ishte zbatimi i Paketës së Sigurisë në Shkolla, përmirësimi i infrastrukturës dhe elementeve të sigurisë në ambientet shkollore, siguria rrugore, mbrojtja nga zjarri, monitorimi me kamera, siguria ushqimore në kopshte dhe në mjediset pranë shkollave, etj.

Gjatë takimit u theksua rëndësia e bashkëpunimit ndërinstitucional dhe angazhimi i çdo institucioni sipas fushës së përgjegjësisë, për të garantuar që çdo nxënës të nisë vitin e ri shkollor në kushte sa më të sigurta dhe cilësore.

Çdo fëmijë i Qarkut Lezhë duhet ti garantohet një shkollë të sigurt, gjithëpërfshirëse dhe mikpritëse.

Edhe pse kompetencat janë të ndara, përgjegjësia për edukimin, sigurinë dhe mirëqenien e fëmijëve tanë është e përbashkët.

Suksese nxënësve, mësuesve dhe prindërve në vitin e ri shkollor 2026–2027!

Prefekti i Qarkut Lezhë priti sot ekipin e ekspertëve kanadezë nga organizata “Firefighters Without Borders” (Zjarrfikës pa Kufij), në kuadër të një nisme për forcimin e kapaciteteve të Shërbimit të Mbrojtjes nga Zjarri dhe Shpëtimit.

Përmes këtij bashkëpunimi, të mbështetur nga Ambasada e Republikës së Shqipërisë në Kanada, Bashkia Lezhë është përzgjedhur për të përfituar nga një seri trajnimesh profesionale në fushën e emergjencave, kërkim-shpëtimit, ndërhyrjeve në zjarre dhe ndihmës së parë të avancuar.

Ky partneritet sjell eksperiencën dhe praktikat më të mira ndërkombëtare, duke kontribuar në rritjen e sigurisë së komuniteteve dhe forcimin e kapaciteteve operacionale të strukturave zjarrfikëse në Qarkun Lezhë.

Nën drejtimin e Prefektit të Qarkut Lezhë, në cilësinë e Kryetarit të Komitetit Rajonal Antitrafikim (KRAT), u zhvillua mbledhja e radhës e këtij komiteti, me pjesëmarrjen e përfaqësuesve të Ministrisë së Punëve të Brendshme: znj. Ami Çarçani, Drejtore e Përgjithshëme në Drejtorinë e Përgjithshme të Politikave të Sigurisë Publike dhe Migracionit; z. Gjergj Prabibaj, Drejtor në Drejtorinë e Politikave të Antitrafikut; z. Ardit Gabili, Drejtor në Drejtorinë e Politikave Kundër Krimit të Organizuar, Migracionit dhe Azilit; si dhe të Kryetarit të Këshillit të Qarkut Lezhë, Zv/Drejtorit të Drejtorisë Vendore të Policisë Lezhë dhe drejtuesve e përfaqësuesve të bashkive dhe institucioneve rajonale.

Gjatë takimit u diskutuan çështje që lidhen me parandalimin dhe luftën kundër trafikimit të qenieve njerëzore, me fokus të veçantë identifikimin dhe mbrojtjen e viktimave të mundshme të trafikimit, si dhe forcimin e mekanizmave të referimit dhe mbështetjes.

Në diskutime u theksua rëndësia e bashkëpunimit dhe koordinimit ndërinstitucional, si një element kyç për parandalimin e trafikimit, adresimin e rasteve në kohë dhe mbrojtjen efektive të personave në rrezik. Po ashtu, u trajtuan aspektet që lidhen me parandalimin e shfrytëzimit për qëllime pune dhe monitorimin e punësimit të shtetasve të huaj gjatë sezonit turistik veror.

Vetëm përmes bashkëpunimit të ngushtë, shkëmbimit në kohë të informacionit dhe veprimit të koordinuar institucional mund të forcohen mekanizmat e parandalimit dhe mbrojtjes së viktimave të mundëshme të trafikimit.

Nën drejtimin e Prefektit të Qarkut  Lezhë u zhvillua takimi koordinues i Task-Forcës Vendore Ndërinstitucionale të Sezonit Turistik 2026 Qarku Lezhë, me pjesëmarrjen e Zëvendësministrit të Punëve të Brendshme, z. Xhemal Qefalia, dhe Zëvendësministres së Turizmit, Kulturës dhe Sportit, znj. Marinela Prifti dhe Kryetarit të Bashkisë Lezhë z. Pjerin Ndreu.

Gjatë takimit u diskutuan masat për garantimin e sigurisë, menaxhimin e trafikut, pastërtinë, mbrojtjen e mjedisit dhe ofrimin e shërbimeve cilësore në zonat turistike.

Bashkëpunimi ndërinstitucional mbetet kyç për një sezon turistik të sigurt dhe të suksesshëm në Qarkun Lezhë.

Në Drejtorinë Vendore të Policisë Lezhë u zhvillua ceremonia përkujtimore me rastin e 25-vjetorit të ndarjes nga jeta të Dëshmorit të Atdheut, Vladimir Ismailukaj.

Të pranishëm ishin Prefekti i Qarkut Lezhë, z. Taulant Malshi, Drejtori i Drejtorisë Vendore të Policisë Lezhë, Drejtues Arben Nasufi, shefat dhe drejtues të strukturave të komisariateve të Policisë Lezhë dhe Kurbin, si dhe familjarë e të afërm të Dëshmorit.2

Gjatë ceremonisë u vlerësuan përkushtimi, integriteti dhe sakrifica e tij në kryerjen e detyrës, ndërsa pranë lapidarit të Dëshmorit në fshatin Markatomaj u vendosën kurora me lule në shenjë nderimi dhe mirënjohjeje.

I përjetshëm qoftë kujtimi i Dëshmorit Vladimir Ismailukaj!

Mirditë, Prefekti i Qarkut Lezhë, së bashku me zëvendësministrin e Punëve të Brendshme, Xhemal Qefalia, prezantuan nënprefekten e re të Mirditës, Flora Jushi.
I urojmë suksese në këtë detyrë të rëndësishme, me besimin se do ta ushtrojë me profesionalizëm dhe përkushtim në shërbim të qytetarëve.

Nën drejtimin e Prefektit të Qarkut Lezhë u zhvillua sot mbledhja konstituive e Këshillit Konsultativ Trepalësh Rajonal.

Në fjalën e tij hapëse, Prefekti theksoi se ky këshill përfaqëson një mekanizëm të rëndësishëm institucional, i cili synon forcimin e dialogut social dhe të bashkëpunimit ndërmjet institucioneve shtetërore, njësive të pushtetit vendor, si dhe organizatave të punëdhënësve dhe punëmarrësve. Ky bashkëpunim synon adresimin e sfidave ekonomike, sociale dhe të punësimit në nivel qarku, kryesisht në evidentimin e disa çështjeve kryesore, ndër të cilat:

• problematikat ekonomike të biznesit të vogël;
• subvencionimi në sektorin e bujqësisë;
• punësimi, aftësimi dhe formimi profesional, si dhe politikat përkatëse;
• krijimi i kushteve të përshtatshme për punësimin e personave me aftësi të kufizuara;
• sfidat e punësimit sezonal;
• respektimi i kontratave të punës;
• siguria dhe shëndeti në punë.

Në vijim të mbledhjes, u miratua rregullorja e funksionimit të këshillit dhe u zgjodhën nënkryetarët dhe anëtarët zëvendësues të përfaqësuesve të organizatave të punëmarrësve dhe punëdhënësve.

Gjithashtu, u paraqitën problematika dhe sugjerime konkrete, për të cilat institucionet përkatëse do të angazhohen në adresimin dhe zgjidhjen në kohë të tyre.

Më datë 22.05.2026, në ambientet e institucionit të Prefektit të Qarkut Lezhë, nën drejtimin e Sekretarit të Përgjithshëm, z. Ilir Ndoka, u zhvillua mbledhja e Tryezës Teknike Antitrafikim (TT).

Gjatë takimit u analizua puna e kryer nga anëtarët e Tryezës në zbatim të Planit të Veprimit për Luftën kundër Trafikimit të Qenieve Njerëzore për periudhën janar–mars 2026, si dhe u diskutuan problematikat aktuale të evidentuara.

Në vijim, u shqyrtuan tre raste të dyshuara si viktima të mundshme të trafikimit, të referuara nga bashkitë Mirditë dhe Kurbin, si dhe nga Drejtoria Vendore e Policisë Lezhë, të cilat vijojnë të monitorohen nga strukturat përgjegjëse.

Drejtuesi i Tryezës la detyrë që institucionet përkatëse të vijojnë monitorimin e rasteve dhe të marrin të gjitha masat e nevojshme për parandalimin dhe minimizimin e fenomenit. Gjithashtu, u kërkua respektimi i plotë i VKM nr. 772, datë 19.12.2025 “Për miratimin e Procedurave Standarde të Veprimit për mbrojtjen e viktimave dhe viktimave të mundshme të trafikimit”, gjatë funksionimit të grupeve ndërinstitucionale për shqyrtimin e rasteve.