Nën drejtimin e Prefektit të Qarkut  Lezhë u zhvillua takimi koordinues i Task-Forcës Vendore Ndërinstitucionale të Sezonit Turistik 2026 Qarku Lezhë, me pjesëmarrjen e Zëvendësministrit të Punëve të Brendshme, z. Xhemal Qefalia, dhe Zëvendësministres së Turizmit, Kulturës dhe Sportit, znj. Marinela Prifti dhe Kryetarit të Bashkisë Lezhë z. Pjerin Ndreu.

Gjatë takimit u diskutuan masat për garantimin e sigurisë, menaxhimin e trafikut, pastërtinë, mbrojtjen e mjedisit dhe ofrimin e shërbimeve cilësore në zonat turistike.

Bashkëpunimi ndërinstitucional mbetet kyç për një sezon turistik të sigurt dhe të suksesshëm në Qarkun Lezhë.

Në Drejtorinë Vendore të Policisë Lezhë u zhvillua ceremonia përkujtimore me rastin e 25-vjetorit të ndarjes nga jeta të Dëshmorit të Atdheut, Vladimir Ismailukaj.

Të pranishëm ishin Prefekti i Qarkut Lezhë, z. Taulant Malshi, Drejtori i Drejtorisë Vendore të Policisë Lezhë, Drejtues Arben Nasufi, shefat dhe drejtues të strukturave të komisariateve të Policisë Lezhë dhe Kurbin, si dhe familjarë e të afërm të Dëshmorit.2

Gjatë ceremonisë u vlerësuan përkushtimi, integriteti dhe sakrifica e tij në kryerjen e detyrës, ndërsa pranë lapidarit të Dëshmorit në fshatin Markatomaj u vendosën kurora me lule në shenjë nderimi dhe mirënjohjeje.

I përjetshëm qoftë kujtimi i Dëshmorit Vladimir Ismailukaj!

Mirditë, Prefekti i Qarkut Lezhë, së bashku me zëvendësministrin e Punëve të Brendshme, Xhemal Qefalia, prezantuan nënprefekten e re të Mirditës, Flora Jushi.
I urojmë suksese në këtë detyrë të rëndësishme, me besimin se do ta ushtrojë me profesionalizëm dhe përkushtim në shërbim të qytetarëve.

Nën drejtimin e Prefektit të Qarkut Lezhë u zhvillua sot mbledhja konstituive e Këshillit Konsultativ Trepalësh Rajonal.

Në fjalën e tij hapëse, Prefekti theksoi se ky këshill përfaqëson një mekanizëm të rëndësishëm institucional, i cili synon forcimin e dialogut social dhe të bashkëpunimit ndërmjet institucioneve shtetërore, njësive të pushtetit vendor, si dhe organizatave të punëdhënësve dhe punëmarrësve. Ky bashkëpunim synon adresimin e sfidave ekonomike, sociale dhe të punësimit në nivel qarku, kryesisht në evidentimin e disa çështjeve kryesore, ndër të cilat:

• problematikat ekonomike të biznesit të vogël;
• subvencionimi në sektorin e bujqësisë;
• punësimi, aftësimi dhe formimi profesional, si dhe politikat përkatëse;
• krijimi i kushteve të përshtatshme për punësimin e personave me aftësi të kufizuara;
• sfidat e punësimit sezonal;
• respektimi i kontratave të punës;
• siguria dhe shëndeti në punë.

Në vijim të mbledhjes, u miratua rregullorja e funksionimit të këshillit dhe u zgjodhën nënkryetarët dhe anëtarët zëvendësues të përfaqësuesve të organizatave të punëmarrësve dhe punëdhënësve.

Gjithashtu, u paraqitën problematika dhe sugjerime konkrete, për të cilat institucionet përkatëse do të angazhohen në adresimin dhe zgjidhjen në kohë të tyre.

Më datë 22.05.2026, në ambientet e institucionit të Prefektit të Qarkut Lezhë, nën drejtimin e Sekretarit të Përgjithshëm, z. Ilir Ndoka, u zhvillua mbledhja e Tryezës Teknike Antitrafikim (TT).

Gjatë takimit u analizua puna e kryer nga anëtarët e Tryezës në zbatim të Planit të Veprimit për Luftën kundër Trafikimit të Qenieve Njerëzore për periudhën janar–mars 2026, si dhe u diskutuan problematikat aktuale të evidentuara.

Në vijim, u shqyrtuan tre raste të dyshuara si viktima të mundshme të trafikimit, të referuara nga bashkitë Mirditë dhe Kurbin, si dhe nga Drejtoria Vendore e Policisë Lezhë, të cilat vijojnë të monitorohen nga strukturat përgjegjëse.

Drejtuesi i Tryezës la detyrë që institucionet përkatëse të vijojnë monitorimin e rasteve dhe të marrin të gjitha masat e nevojshme për parandalimin dhe minimizimin e fenomenit. Gjithashtu, u kërkua respektimi i plotë i VKM nr. 772, datë 19.12.2025 “Për miratimin e Procedurave Standarde të Veprimit për mbrojtjen e viktimave dhe viktimave të mundshme të trafikimit”, gjatë funksionimit të grupeve ndërinstitucionale për shqyrtimin e rasteve.

Më datë 07.05.2026 nën drejtimin e Prefektit të Qarkut Lezhë, z. Taulant Malshi, u zhvillua mbledhja e Komitetit Rajonal të Zhvillimit të Turizmit.

Në këtë takim, krahas anëtarëve të KRZHT-së, morën pjesë drejtues të institucioneve rajonale dhe vendore me përgjegjësi në fushën e turizmit, si dhe përfaqësues të bizneseve që operojnë në këtë sektor.

Në fokus të takimit ishte koordinimi i masave dhe bashkëpunimi ndërinstitucional për garantimin e një sezoni turistik sa më të suksesshëm për vitin 2026, si dhe adresimi në kohë i problematikave dhe sfidave të evidentuara nga institucionet dhe operatorët turistik.

Në ambientet e Pallatit të Kulturës “Ded Ndue Lazri”, Lezhë, nën drejtimin e Prefektit të Qarkut Lezhë, z. Taulant Malshi, u zhvillua mbledhja e Komisionit të Mbrojtjes Civile të Qarkut Lezhë.
Në takim morën pjesë anëtarët e KMCQ-së, strukturat e MZSH-së, Mbrojtja Civile e bashkive, si dhe përfaqësues nga drejtoritë rajonale. U theksua rëndësia e koordinimit ndërinstitucional, forcimit të masave parandaluese, paralajmërimit të hershëm dhe reagimit të shpejtë ndaj emergjencave.
Të pranishëm ishin edhe Drejtori i Përgjithshëm i AKMC-së, z. Haki Çako, si dhe përfaqësues të AKZM-së, të cilët nënvizuan rolin kyç të bashkive dhe nevojën për forcimin e kapaciteteve njerëzore e logjistike për menaxhimin e emergjencave civile.

Me datë 9 prill 2026 në ambjentet e Prefekturës së Qarkut Lezhë, u zhvillua një vizitë zyrtare nga një delegacion i Republikës së Polonisë, i kryesuar nga Ambasadori, Shkëlqesia e Tij z. Vojciech Unolt, me pjesëmarrjen e përfaqësuesve të lartë të Shërbimit Zjarrfikës polak, ndër ta edhe Zëvendësdrejtori i Përgjithshëm, Lt. Col. Tomasz Czyż.

Delegacioni shoqërohej nga Drejtori i Përgjithshëm i MZSH-së, Drejtues i Parë Zjarrfikës Arben Cara dhe u prit nga Prefekti i Qarkut Lezhë, z. Taulant Malshi.

Gjatë takimit, u vlerësuan marrëdhëniet e mira mes dy vendeve, të cilat kanë marrë një zhvillim të ri pas tërmetit të vitit 2019. U theksua se është në proces hartimi një marrëveshje e re bashkëpunimi, e fokusuar kryesisht në trajnimet e personelit të shërbimit zjarrfikës.

Pala polake evidentoi nevojën për përmirësimin e pajisjeve dhe mjeteve zjarrfikëse, ndërsa shprehu gatishmërinë për të mbështetur projekte konkrete përmes fondeve të Bashkimit Europian, me qëllim forcimin e kapaciteteve në këtë sektor.

Nga ana e tij, Drejtori i Përgjithshëm i MZSH-së paraqiti situatën aktuale në Qarkun Lezhë, duke theksuar mungesën e infrastrukturës bashkëkohore dhe nevojën për ndërhyrje ligjore në funksion të rritjes së eficiencës së shërbimit.

Takimi nënvizoi rëndësinë e bashkëpunimit dhe shkëmbimit të eksperiencave për përmirësimin e menaxhimit të emergjencave dhe rritjen e sigurisë së qytetarëve.

Sot, më datë 31.03.2026 në drejtimin e Prefektit të Qarkut Lezhë z. Taulant Malshi u zhvillua takimi i parë i Task-Forcës Vendore Anti-Kanabis për vitin 2026.

Në këtë takim morën pjesë  drejtor i Drejtorisë së Politikave Kundër Krimit të Organizuar, Migracionit dhe Azilit në Ministrinë e Punëve të Brendshme z. Ardit Gabili, drejtues të Drejtorisë Vendore të Policisë Lezhë, drejtues të bashkive të qarkut, të institucioneve  vendore/rajonale dhe të strukturave të mbrojtjes, që kanë detyrime ligjore në luftën kundër kultivimit e trafikimit të lëndëve narkotike.

Në fjalën e tij Prefekti vlerësoi punën e deritanishme të bërë nga anëtarët e Task –Forcës Antikanabis dhe vuri theksin në disa aspekte të rëndësishme si: rritjen e vigjilencës dhe reagimit nga ana e strukturave përgjegjëse, kryerjen e kontrolleve, analizave dhe raportimeve periodike, forcimin e bashkëpunimit ndërinstitucional, kryerjen e aktiviteteteve ndërgjegjësuese me qëllim parandalimin e rasteve të kultivimit dhe trafikimit të lëndëve narkotike.

Në diskutimet e tyre, përfaqësuesi i MPB, si dhe anëtarët e Task – Forcës theksuan rëndësinë e marrjes së masave nga të gjithë institucionet, hartimin e një plan- veprimi me masa konkrete, si dhe strategji të reja duke shtuar numrin e grupeve të punës, përdorimin e teknologjisë me synim rritjen e efikasitetit të punës në këtë drejtim, si dhe nevojën për një bashkëpunim ndërinstitucional më efikas.

Me datën 10.10.2025, në Institucionin e Prefektit të Qarkut Lezhë, Prefekti z. Taulant Malshi zhvilloi një takim me përfaqësues të Inspektoratit Shtetëror të Mbikëqyrjes së Tregut, z.Erion Prifti, Drejtor i Drejtorisë Teknike dhe z.Albert Shqalshi, Përgjegjës i Sektorit të Produkteve Mekanike.
Qëllimi i takimit ishte forcimi i bashkëpunimit ndërinstitucional për garantimin e sigurisë së ashensorëve dhe jetës së qytetarëve.

U theksua nevoja për koordinim të ngushtë me Njësitë e Vetëqeverisjes Vendore, me qëllim rritjen e efikasitetit në regjistrimin, monitorimin dhe mbikëqyrjen e pajisjeve.
Përfaqësuesit e ISHMT paraqitën situatën aktuale në nivel qarku dhe problematikat e konstatuara, duke theksuar rëndësinë e ndërgjegjësimit të subjekteve private dhe administratorëve.
Prefekti z. Taulant Malshi vlerësoi rëndësinë e këtij bashkëpunimi dhe shprehu gatishmërinë e institucionit për të koordinuar punën me bashkitë e qarkut, me synimin për të siguruar mjedise më të sigurta për qytetarët dhe respektimin e detyrimeve ligjore në fushën e sigurisë teknike të ashensorëve.